والله إتخنقنا من كتر إنقطاع المياه وعمالين نبعت فى شكاوى ولا حد سائل فينا (النظام القديم لسه شغال إتكلموا وإعملوا إللى إنتوا عايزينه وإحنا حنعمل برضوا إللى فى دماغنا) ولما نتصل بالخط الساخن 125 يقولنا الميه حلوة بس الناس هيه إللى بتفترى ولما نقول للأستاذ إللى على الخط الساخن 125 دا فيه مننا فى الدور الأول ومركب موتور لإن الميه مقطوعه عنده يقولنا دا إفترى منه وكإن إللى فى الدور الأول غاوى يكلف نفسه ويجيب موتور بدون ما الميه تكون ضعيفة عنده
والمفاجأة الكبرى الأولى إن شركة المياه بالإسكندرية حاصلة على شهادة الأيزو والمسئولين حاصلين على شهادات تقدير والمعلومة دى من الموقع الرسمى للشركة يا فرحتنا بشركتنا وشهادتها وإحنا فين رأينا قبل ما تاخد الشركة الشهادات دى مش المفروض يشوفوا الخدمة بتوصل إزاى للعملاء وللا هيه العملية ماشية إزاى؟؟؟؟؟
أما المفاجأة الكبرى الثانية إن الشركة عاملة إستطلاع رأى عن مدى رضاء العملاء عن خدمات الشركة والإختيارات(ممتاز جيد مقبول)فقط!!!!! طب أين ضعيف أو سىء أتحدى لو كان فى إختيار أقل من سئ كان حيبقى ده الإختيار الأكثر تصويتا من كل الناس بدليل أن النسبة الأكبر فى التصويت للإختيار (مقبول) لأنه بالطبع أقل إختيار موجود
بصراحة إحنا نفسنا المسئولين عن شركة المياه فى منطقتنا يتغيروا ( ما دام همه مش قد المسئولية) بس نروح لمين ومين يسمع لكلامنا إحنا غلبنا وللا لازم نعمل اعتصام أمام الشركة عشان تتحل مشكلة الميه(بصراحة إسكندرية كلها ما حتصدق لو حد دعى للإعتصام ده لإن إسكندرية كلها إتخنقت بصراحة مش إحنا بس) والمحافظة تقول شركة الميه السبب وشركة الميه تقول الحى هوه السبب وشكلنا إحنا السبب إن نفسنا نفتح الحنفيه نلاقى ميه وللا يمكن الموتور هوه السبب لإنه مش متركب على طبق دش عشان يجيب لنا ميه فضائى بدل الأرضى إللى ما بتجيش!!
كلمة أخيرة نوجهها إلى كل مسئول لديه ضمير حى ويخاف ربنا سواء كان محافظ الإسكندرية (بإعتباره المسئول عن كل الخدمات بالمحافظة) أو رئيس حى المنتزة أو رئيس شركة مياه الشرب بالإسكندرية أو رئيس فرع الشركة المسئول عن منطقتنا. نرجوا إتخاذ اللازم والإسراع فى حل مشكلتنا . ونحن متأكدون مثلكم تماما أنها مشكلة عامة على مستوى المحافظة (كما قال لنا مسئول الخط الساخن للشركة 125) وهذا بالطبع يستدعى بالفعل ضرورة حل هذه المشكلة . وحسبنا الله ونعم الوكيل
مع الشكر الجزيل لكل من ينشر لنا مشكلتنا ويسهم فى حلها،
مع الإعتذار لوجود أى خطأ إملائى أو نحوى غير مقصود
أهالى منطقة 45 يمين العصافرة قبلى الإسكندرية مصر

By: أحمد رسلان